Öspin tilnefnd til Íslensku Lýðheilsuverðlaunanna

Helgi Páll Þórisson — Wed, 05 Apr 2023 13:35:26 +0000

Íþróttafélagið Ösp fékk á dögunum tilnefningu til Íslensku Lýðheilsuverðlaunanna. Íslensku lýðheilsuverðlaunin eru verðlaun sem unnin eru í samvinnu við heilbrigðisráðuneytið, embætti landlæknis, Geðhjálp og Íþrótta- og Ólympíusamband Íslands. Verða þessi verðlaun veitt í fyrsta sinn núna í vor. Óskað var eftir tillögum frá almenningi um hver ætti að hljóta þessa viðurkenningu fyrir framlag til eflingar lýðheilsu á Íslandi. Ánægjulegt var að heyra að Öspin fékk fjölda tilnefninga frá almenningi til þessar verðlauna.

Einsog segir á vef Forseta Íslands : „Íslensku lýðheilsuverðlaununum er ætlað að vekja athygli á mikilsverðu framlagi á sviði lýðheilsu og auka með þeim hætti áhuga á bættri heilsu og líðan almennings. Veitt verða verðlaun í tveimur flokkum, annars vegar til einstaklings og hins vegar til samtaka, stofnunar eða fyrirtækis sem hefur látið gott af sér leiða á þessu sviði.“

Tilkynnt verður hver hlýtur verðlaunin í hátíðlegri athöfn á Bessastöðum sem sjónvarpað verður á RÚV þann 19. apríl. Hægt er að lesa nánar um hverjir aðrir hafa verið tilnefndir á vef Forseta Íslands.

Við hjá íþróttafélaginu Ösp erum ólýsanlega þakklát og uppi með okkur með þessa tilnefningu og það verður spennandi að sjá þann 19.apríl hver hlýtur þessi Lýðheilsuverðlaun í ár.

Íþróttafélagið Ösp fær Hvatningarverðlaun ÖBÍ

Helgi Páll Þórisson — Fri, 04 Dec 2020 20:32:53 +0000

Frábærar fréttir fyrir okkur í Íþróttafélaginu Ösp.

Í gær á alþjóðadegi fatlaðs fólks, voru Hvatningarverðlaun Öryrkjabandalagsins veitt í fjórtánda sinn. Verndari verðlaunanna er forseti Íslands, hr. Guðni Th Jóhannesson, og var hann viðstaddur afhendingu þeirra. Vegna sóttvarna afhenti forsetinn ekki verðlaunin eins og venja hefur verið. Helga Hákonardóttir formaður, og Sverrir Gíslason varaformaður, voru viðstödd afhendinguna sem streymt var á netinu. Þessi verðlaun eru fyrst og fremst að þakka öllum þeim frábæru þjálfurum sem eru hjá okkur og án þeirra væri félagið sannarlega ekki jafnt auðugt og það er í dag.

Innilega til hamingju kæru Asparar

Hægt er að lesa nánar um verðlaunin og afhendinguna hér vef ÖBÍ hér https://www.obi.is/is/moya/news/hvatningarverdlaun-obi-afhent-i-fjortanda-sinn

Verðlaunagripurinn. Mynd: Helga Hákonardóttir

Hr. Guðni Th. Jóhannesson, forseti Íslands og verndari verðlaunanna, afhendir verðlaunin. Mynd: ÖBÍ

Viðurkenningarskjal Hvatningarverðlaunanna. Mynd: Helga Hákonardóttir.

Íþróttafélagið Ösp |

Öspin tilnefnd til Íslensku Lýðheilsuverðlaunanna

Íþróttafélagið Ösp fær Hvatningarverðlaun ÖBÍ