Fótbolti án aðgreiningar – Alþjóðlegt knattspyrnumót 16. september

Þann 16. september n.k. fer fram alþjóðlegt knattspyrnumót í Egilshöll sem ber yfirskriftina Fótbolti án aðgreiningar / Football without restrictions en keppendur eru bæði fatlaðir og ófatlaðir.

Íþróttafélagið Ösp og Knattspyrnusamband Íslands stýra undirbúningi og skipulagi mótsins í samstarfi við ÍF og Special Olympics á Íslandi. Þetta er fyrsta alþjóðlega knattspyrnumót fatlaðra og ófatlaðra sem haldið er hér á landi.

Hingað til lands koma þrjú erlend lið, tvö frá Færeyjum og eitt frá Eyjunni Mön. Íslensku félögin sem taka þátt í mótinu eru félögin Ösp, Nes, Suðri, FC Sækó og þá mun 4. flokkur Fjölnis vera sérstakt gestalið á mótinu.

Mótið hefst kl. 10:00 þar sem Guðni Bergsson, formaður KSÍ, mun sjá um setningu mótsins. Keppni hefst svo kl. 10:30 en keppt verður í tveimur sex liða riðlum, tveimur styrkleikaflokkum. Leikið er í 5 manna bolta. Leiki og tímasetningar er að finna hér að neðan.

Íþróttafélagið Ösp, ÍF og KSÍ vilja hvetja alla sem áhuga hafa á knattspyrnu að mæta og styðja við bakið á keppendum á jákvæðan og skemmtilegan hátt. Aðgangur er ókeypis og er þetta því tilvalið tækifæri til að berja þessar knattspyrnustjörnur augum.

Verðlaunaafhending kl. 15:00.